میرزا معجز شبستری و مبارزه با خرافات دینی و مقایسه محدودیت های اجتماعی ایران با جهان خارج

قسمت قبلی

قسمت چهارم

خوش اولار سیزین دیارین گل و لاله و هزاری

او هزار و لاله زارین نغماتی بی نهایت

او طرف گؤز للرینین گؤزو، قاشی دلربادر

حرکاتی جانفزا هم، سکناتی بینهایت.

وئریر ال اله قیز اوغلان دانیشار، گولر، ایچر می

چالینار کمانچا ایله نی، ائدر استماع الف بِی

لب یاری یار اؤپنده دییه ر عرش و فرش اوخی

سئوه رم عموغلی من ده او حیانی بی نهایت.

بیزیم اؤلکه ده ولکن گولوب اویناماق دانیشماق

قدغندی تار چالماق و کمانچانی ائشیتماق

دفه سیللی وورماق اولماز و گناهدر می ایچماق

ولی باشا وورماغین وار حسناتی بینهایت.

یوزینه بیزیم گؤزللر سالی بیر نقاب قالین

میکروسکوپیله باخسان گؤره بیلمه سن جمالین

بیری گر آچا جمالین توپوره ر اونا ملاعین

داما تیر سالاندا سؤیلر صلواتی بینهایت.

آغا چیخدی منبر اوسته نئجه گور چیخیر اؤزوندن

دانیشیر غروریله باخ، نئجه اود چیخیر گؤزوندن

ائله قیشقیریر که منبر تیتیریر اونون سؤزوندن

بویورور بو سؤزلرین وار صلواتی بینهایت.

اوخویوب یازان خانملار یازار عاشقینه نامه

او که یازدی نامه دئینن گئده جک اسیر شامه

وئره هر کس ای جماعت قزینین الینه خامه

اولی روز حشر او شخصین حسراتی بینهایت.

دئدی دوشدی چون نفسدن او جناب اشرف الناس

من ایاقه دوردوم اوندا دئدیم: ای گروه نسناس

دئیین او گؤبک یازانه قلمین اوجون یاواش باس

گؤبگینی اینجیدیرسن عوراتی بینهایت.

بیلیرم نه در خیالی حضراتین ای محبان

دئییسیز که خدمت ایلر بیزه کبله ملا قربان

یازیلارسا ناف نسوان چوخالار نفوس ایران

وطنه اولار اولارین خدماتی بینهایت.

فقط ای حاجی داداشلار چون ائدیر نظاره فالچی

کلم لطیف نافه کیریخیر بیچاره فالچی

قلمی وورار دواته چیخادار دوباره فالچی

طرفینه وار بو کارین زحماتی بینهایت.

اولا گر سوادی یاران مشهدی تکذّبانین

قاباغیندا عورت آچماز گؤبگین فلان آغانین

او تکذبان محرم گؤبگین یازاندا قانون

ائدر حفظ آبروی حضرات بینهایت.

دیوان معجز شبستری، جلد اول، صفحه ۷۷